5.1

5.2

5.3

5.4

5.5

5.6

5.7

5.8

5.9

6.1

6.2

6.3

7.1

7.2

7.3

8.1

8.2

8.3

8.4

CUSPAIREAN

• Feallsanachd agus dealbh a’ chlàr-teagaisg
• Leasachadh a’ chlàr-teagaisg
• Prògraman agus cùrsaichean
• Gluasadan¹⁶

PRÌOMH CHOMHARRAN:

 ÌRE 5 EISIMPLEIR

• Tha feallsanachd soilleir anns a’ chlàr-teagaisg againn stèidhichte air luachan coitcheann. Tha e dealbhte airson adhartachadh air dùbhlan, toileachadh, farsaingeachd agus doimhne, adhartas, iomchaidheachd, leantainneachd, pearsantachadh agus roghainn ionnsachaidh don h-uile sgoilear. Tha an clàr-teagaisg a’ toirt aire do ar suidheachadh ionadail agus do chomhairle ionadail agus nàiseanta. Tha e a’ fàgail comas airson luchd-teagaisg fa leth agus mar sgioban ùr-ghnàthachaidhean làn-bheachdaichte a thoirt a-steach gus coinneachadh ri feuman luchd-ionnsachaidh.
• Bidh sinn a’ leasachadh agus ag ùrachadh ar clàr-teagaisg gu cunbhalach, a’ toirt com-pàirt don h-uile neach-teagaisg ann agus a’ toirt aire do bheachdan ar luchd-ionnsachaidh agus pàrantan. Bidh sinn a’ beachdachadh ann an sgioban luchd-obrach air ìre agus càileachd shuidheachaidhean do luchd-ionnsachaidh, buaidh nan suidheachaidhean sin air luchd-ionnsachaidh agus na builean a tha iad a’ coileanadh. Bidh sinn a’ dèanamh planadh cùramach agus ann an co-chomhairle ri com-pàirtichean airson ùr-ghnàthachaidhean clàr-teagaisg, atharrachadh ann an coinneachadh ri feuman luchd-ionnsachaidh, agus cothroman airson roghainnean a dhèanamh agus, far am bi e iomchaidh, airson spèisealachadh.
• Tha ar prògraman agus cùrsaichean beothail, dùbhlanach, iomchaidh agus tlachdmhor. Bidh sinn a’ dèiligeadh ri luchd-ionnsachaidh, agus a’ coinneachadh ri na feuman aca. Tha an clàr-ama a’ toirt taic do adhartas taobh a-staigh raointean clàr-teagaisg agus ceanglaichean eadar raointean ionnsachaidh. Bidh luchd-teagaisg a’ leasachadh sgilean litearrachd agus àireamhachd luchd-ionnsachaidh a tha a’ freagairt air an raon clàr-teagaisg. Tha ar clàr-teagaisg a’ dèanamh àrdachadh fìor mhath air coileanaidh san fharsaingeachd agus tha luchd-ionnsachaidh a’ fàs mar phoball.
• Bidh sinn a’ dèanamh cinnteach nuair a ghluaiseas luchd-ionnsachaidh do no bho ar sgoil, no nuair a bhios greis-gnìomhachais coitcheann aca eadar an sgoil againn agus sgoil eile, gun cùm iad suas leantainneachd agus adhartas san ionnsachadh aca. Bidh sinn a’ dèanamh cinnteach gu bheil ar luchd-ionnsachaidh cruthachail, iomairteach agus ullaichte airson saoghal na h-obrach agus an dreuchdan ri teachd.

ÌRE 2 EISIMPLEIR

• Tha laigsean ann an dealbh a’ chlàr-teagaisg againn, mar eisimpleir, ann am planadh doimhneachd no adhartas ann an ionnsachadh no ann an leasachadh saoranachd cùramach no ann an coinneachadh ri prìomh riatanasan ann an comhairle nàiseanta. Ged a tha e a’ coinneachadh ri feuman a’ mhòr-chuid de sgoilearan, feumaidh sinn ullachadh nas fheàrr a dhèanamh airson buidhnean sònraichte de sgoilearan no dèiligeadh ri laigsean ann an cuid de raointean clàr-teagaisg. Chan eil rùm gu leòr ann airson sùbailteachd no ùr-ghnàthachadh.
• Chan eil leasachadh ar clàr-teagaisg stèidhichte air fèin-mheasadh èifeachdach agus cha do rinn e am feum as fheàrr de eòlas agus com-pàirt luchd-teagaisg. Chan eil sinn air ar clàr-teagaisg ùrachadh gu math gus dèiligeadh ri feuman atharrachail agus cha do rinn sinn atharrachadh gu leòr ris gus coinneachadh ri feuman ar luchd-ionnsachaidh. Chan eil mòran roghainn ann a thaobh cothruim no càileachd no tha e air a thabhann a-mhàin do buidhnean luchd-ionnsachaidh àraidh.
• Tha laigsean sa chlàr-teagaisg ann an toirt taic do luchd-ionnsachaidh gus an comas airson coileanadh a thoirt gu buil. Chan eil cuid de na prògraman agus cùrsaichean againn beothail agus dùbhlanach gu leòr. Feumaidh sinn ar clàr-teagaisg atharrachadh airson coinneachadh nas fheàrr ri feuman bhuidhnean luchd-ionnsachaidh sònraichte. Tha ar n-ullachadh airson clàran-ama agus airson leasachadh air sgilean tron chlàr-teagaisg, gu sònraichte litearrachd agus àireamhachd, a’ cur feum air leasachadh. Chan eil eòlas, sgilean agus tuigse agus coileanadh iomchaidh san fharsaingeachd a’ dol fada gu leòr tron chlàr-teagaisg againn.
• Chan eil sinn a’ dèanamh ceangal èifeachdach gu leòr ri sgoiltean eile gus dèanamh cinnteach gum bi leantainneachd ann an ionnsachadh aig amannan gluasaid. Chan eil sinn daonnan a’ dèanamh cinnteach gu bheil ar luchd-ionnsachaidh cruthachail agus iomairteach no ullaichte airson saoghal na h-obrach.

CUSPAIREAN

• An suidheachadh ionnsachaidh agus modhan teagaisg
• Eadar-obrachadh tidsear-sgoilear a’ gabhail a-steach com-pàirt luchd-ionnsachaidh
• Soilleireachd agus adhbharan còmhraidh
• Breithneachaidhean a rinneadh rè an teagaisg

PRÌOMH CHOMHARRAN:

Tha an comharra seo co-cheangailte ri càileachd an teagaisg airson ionnsachadh èifeachdach a thaobh àrainneachd mhath agus diofar shuidheachaidhean a bhios a’ brosnachadh ionnsachadh le toirt air luchd-ionnsachaidh smaoineachadh. Tha e a’ cur cudrom air an fheum air sreath eadar-dhealaichte agus beachdaichte de mhodhan teagaisg sgileil agus aig astar iomchaidh far am bi luchd-teagaisg agus luchd-ionnsachaidh ag eadar-obrachadh gus dèanamh cinnteach gu bheil an teagasg brosnachail agus iomchaidh do fheuman luchd-ionnsachaidh. Tha e a’ sònrachadh cleachdadh eadar-obrachadh tidsear-sgoilear gus breithneachadh mar a bu chòir teagasg agus gnìomhan a bhith air an stiùireadh airson coinneachadh ri feuman luchd-ionnsachaidh. Tha an comharra a’ toirt àite do phàirt cudromach teicneòlas fiosrachaidh agus conaltraidh (ICT) ann an neartachadh an teagaisg agus toirt taic agus brosnachadh don ionnsachadh.

ÌRE 5 EISIMPLEIR

• A’ togail air ar luachan coitcheann, tha sinn a’ cruthachadh àrainneachd ionnsachaidh bheothail a’ cleachdadh modhan teagasg agus ionnsachaidh sgileil agus aig astar freagarrach. Tha fèin-fhiosrachadh an luchd-ionnsachaidh air a mhaidseadh gu math ri na feuman aca agus a’ cumail an ùidh agus an aire. Bidh sinn a’ leasachadh comasan luchd-ionnsachaidh a bhith a’ ceasnachadh agus a’ cruthachadh agus a’ dèanamh smaoineachadh sgrùdail. Tha gnìomhan agus obair nar clasaichean agus gnìomhan ionnsachadh san dachaigh air am planadh gu math agus a’ gabhail a-steach luchd-ionnsachaidh mar luchd-pàirteachaidh èifeachdach, ag obair air an ceann fhèin agus a’ co-obrachadh le daoine eile ann am fuasgladh cheistean. Bidh sinn a’ dèanamh feum iomlan agus èifeachdach de ICT rè an teagaisg agus an ionnsachaidh.
• Bidh sinn a’ co-roinn adhbharan leasain ri luchd-ionnsachaidh. Tha fios aig luchd-ionnsachaidh dè dh’fheumas iad a dhèanamh airson a bhith a’ fàs nas fheàrr agus nas soirbheachail. Tha am mìneachadh agus stiùireadh againn soilleir agus tha iad a’ togail air na chaidh ionnsachadh roimhe agus air suidheachaidhean fìor. Tha sinn a’ dèanamh cinnteach gum bi cothroman aig luchd-ionnsachaidh uallach a ghabhail airson pàirtean den ionnsachadh aca fhèin agus an dàimhean ri daoine eile. Tha na tha iad a’ fiosrachadh a’ còrdadh ri luchd-ionnsachaidh agus tha iad a’ dèanamh adhartas anns na sgilean aca mar luchd-ionnsachaidh. Tha iad an sàs anns an ionnsachadh agus mothachail orra fhèin mar luchd-ionnsachaidh. Bidh sinn a’ cleachdadh fiosrachadh air ais gu h-èifeachdach gus ionnsachadh adhartachadh.
• Tha an teagasg againn a’ toirt làn chom-pàirt do luchd-ionnsachaidh agus gam misneachadh gu beachdan a thoirt agus ceistean fhaighneachd. Bidh sinn a’ cleachdadh ceasnachadh agus beachdachadh sgileil airson ùidh luchd-ionnsachaidh a bheothachadh, toirt orra smaoineachadh agus am misneachd a thogail. Tha sinn a’ cur meas air freagairtean luchd-ionnsachaidh, a’ togail orra agus gam misneachadh.
• Ann an leasain, bidh sinn a’ dèanamh breithneachaidhean glic agus a’ gluasad gu luath gus dèanamh cinnteach gu bheil an teagasg againn a’ coinneachadh ri feuman dhaoine fa leth agus a’ toirt taic agus dùbhlan iomchaidh. Bidh sinn a’ comharrachadh agus a’ dèiligeadh ri laigsean ann an eòlas agus sgilean luchd-ionnsachaidh.

ÌRE 2 EISIMPLEIR

• Tha ar suidheachadh ionnsachaidh a’ misneachadh ionnsachadh ach chan eil e beothail no a’ cuideachadh luchd-ionnsachaidh gu smaoineachadh sgrùdail no cruthachail. Chan eil ar dòighean-obrach daonnan aig astar iomchaidh no air am maidseadh gu math ri feuman luchd-ionnsachaidh. Chan eil sinn a’ dèanamh feum gu leòr de chaochladh mhodhan teagaisg agus ionnsachaidh. Chan eil sinn a’ toirt cothroman gu leòr air ar luchd-ionnsachaidh a thoirt air adhart mar luchd-pàirteachaidh gnìomhach is urrainn obrachadh gu math air an ceann fhèin agus le misneachd. Chan eil sinn a’ dèanamh feum iomlan agus èifeachdach de ICT ann an teagasg agus ionnsachadh. Bidh sinn a’ toirt gnìomhan ionnsachadh san dachaigh don luchd-ionnsachaidh, ach chan eil seo daonnan air a phlanadh no air a cheangal gu math ri obair sa chlas.
• Bidh sinn ag atharrachadh dè cho math ’s a bhios sinn a’ co-roinn adhbharan leasain ri luchd-ionnsachaidh no a’ mìneachadh dè dh’fheumas iad a dhèanamh airson leasachadh gu bhith nan luchd-ionnsachaidh soirbheachail. Chan eil ar n-eadar-obrachadh leis a’ chlas, buidhnean agus daoine daonnan a’ toirt taic agus dùbhlan do luchd-ionnsachaidh. ’S dòcha nach eil a’ toirt ùine gu leòr do luchd-ionnsachaidh airson smaoineachadh mus freagair iad. Feumaidh sinn barrachd chothroman a thoirt do luchd-ionnsachaidh uallach a ghabhail airson pàirtean den ionnsachadh aca agus an dàimhean ri daoine eile.
• Tha ar còmhradh ri luchd-ionnsachaidh air a stiùireadh cus le luchd-teagaisg. Chan eil sinn a’ cleachdadh freagairtean luchd-ionnsachaidh gu h-èifeachdach gus misneachd a thoirt dhaibh a bhith a’ toirt beachdan agus a’ faighneachd cheistean. Chan eil sinn a’ toirt làn chom-pàirt don h-uile neach-ionnsachaidh.
• Cha bhi sinn daonnan a’ dèiligeadh gu h-èifeachdach ri laigsean ann an tuigse luchd-ionnsachaidh gus dèanamh cinnteach gu bheil an teagasg againn air a mhaidseadh ri na feuman aca. Chan eil mòran cothruim aig luchd-ionnsachaidh fa leth a thighinn thugainn agus fiosrachadh fhaighinn air ais mu chàileachd na h-obrach aca agus dè dh’fhaodas iad a dhèanamh airson a leasachadh.

CUSPAIREAN

• Gnìomhan, obair agus goireasan
• Comharrachadh feuman ionnsachaidh
• Dleastanasan luchd-teagaisg agus luchd-obrach spèisealta
• Coileanadh agus buileachadh nan riatanasan reachdais

PRÌOMH CHOMHARRAN:

Tha an comharra seo co-cheangailte ri ullachadh na sgoile airson coinneachadh ri feuman a h-uile neach-ionnsachaidh, a’ gabhail a-steach buidhnean a dh’fhaodadh a bhith so-leònte, agus a’ dèiligeadh ri bacaidhean ron ionnsachadh. Tha seo a’ gabhail a-steach comharrachadh fheuman, agus a’ toirt taic agus dùbhlan do bhuidhnean agus dhaoine a dh’fhaodadh a bhith a’ cur feum air taic a bharrachd ag èirigh bho, mar eisimpleir, an àrainneachd ionnsachaidh, suidheachadh theaghlaichean, feuman ciorraim no slàinte; no nithean sòisealta agus faireachail.

ÌRE 5 EISIMPLEIR

• Bidh sinn a’ maidseadh obair ionnsachaidh ri feuman luchd-ionnsachaidh agus buidhnean fa leth le diofar chomasan no sgilean. Tha na gnìomhan, an obair agus na goireasan againn a’ toirt taic agus dùbhlan iomchaidh gus am faigh a h-uile neach-ionnsachaidh air an adhartas a mheudachadh. Tha ar cùrsaichean agus prògraman a’ coinneachadh ri caochladh fheuman luchd-ionnsachaidh. Tha astar an ionnsachaidh freagarrach airson daoine fa leth.
• Bidh sinn a’ comharrachadh, ag ath-sgrùdadh agus a’ measadh feuman luchd-ionnsachaidh a’ gabhail a-steach an fheadhainn le feuman a tha glè eadar-dhealaichte bho fheuman an comhaoisean. Bidh sinn ga dhèanamh tro obrachadh gu dlùth còmhla ri ar luchd-ionnsachaidh, am pàrantan agus seirbheisean com-pàirteachais.
• Bidh sinn a’ toirt ceumannan taiceil agus for-ghnìomhach gus dèanamh cinnteach gu bheil nithean mar an àrainneachd ionnsachaidh, suidheachadh theaghlaichean, feuman slàinte no ciorraim, no nithean sòisealta no faireachail a dh’fhaodadh ionnsachadh a chumail air ais air an comharrachadh gu luath agus gun tèid dèiligeadh riutha gu h-èifeachdach. Tha tidsearan taic agus buidhnean com-pàirteachais san sgoil againn a’ toirt taic agus comhairle luachmhor do luchd-teagaisg agus do luchd-ionnsachaidh fa leth agus a’ cuideachadh le coinneachadh ri feuman ionnsachaidh.
• Tha targaidean ionnsachaidh iomchaidh don luchd-ionnsachaidh againn ann am prògraman foghlaim pearsanta agus planaichean taice co-òrdanaichte. Bidh sinn a’ toirt com-pàirt mhath do phàrantan agus luchd-ionnsachaidh ann an ath-sgrùdadh feuman luchd-ionnsachaidh agus planaichean ionnsachaidh.

ÌRE 2 EISIMPLEIR

• Ged a tha cuid den obair air a mhaidseadh ri feuman luchd-ionnsachaidh fa leth, chan eil sinn daonnan a’ toirt aire gu leòr do na bha iad air ionnsachadh roimhe. Chan eil ar gnìomhan, obair agus goireasan daonnan a’ toirt na taice agus an dùbhlain a dh’fheumar airson luchd-ionnsachaidh a chuideachadh a’ coileanadh an ath cheuman anns an ionnsachadh.
• Bidh sinn a’ gabhail ceumannan airson feuman ionnsachaidh a chomharrachadh ach chan eil sinn a’ toirt aire gu leòr don fheadhainn a dh’fheumas taic no dùbhlan a bharrachd. Tha laigsean san ullachadh againn airson obrachadh còmhla ri luchd-ionnsachaidh, am pàrantan agus buidhnean iomchaidh gus am feuman a chomharrachadh.
• Nuair a bhios sinn a’ planadh gnìomhan ionnsachaidh agus taic a bharrachd, chan eil aire gu leòr air a thoirt do nithean a dh’fhaodadh bacadh a chur air ionnsachadh. Tha tidsearan taic agus buidhnean com-pàirteachais a’ toirt beagan comhairle, taic agus trèanadh do prìomh mhanaidsearan, luchd-teagaisg agus luchd-ionnsachaidh mu ciamar a thèid coinneachadh ri feuman ionnsachaidh.
• Chan eil sinn a’ dèanamh feum mhath de reachdas làithreach gus ar cuideachadh a’ coinneachadh ri feuman luchd-ionnsachaidh. Tha beàrnan nar clàradh agus nar n-ullachadh airson sgrùdadh air feuman luchd-ionnsachaidh fa leth.

CUSPAIREAN

• Modhan measaidh
• Planadh suidheachaidhean agus obair ionnsachaidh
• Cleachdadh fiosrachadh bho mheasadh airson comharrachadh agus planadh ionnsachadh ri teachd
• Ullachadh airson clàradh agus aithisgean

PRÌOMH CHOMHARRAN:

Tha an comharra seo co-cheangailte ri com-pàirt luchd-teagaisg, luchd-ionnsachaidh agus pàrantan ann an cleachdadh diofar fiosrachaidh bho mheasadh airson ionnsachadh agus adhartas a leasachadh, agus airson meòrachadh air càileachd an teagaisg. Tha e a’ cur cudrom air measadh mar phàirt bunaiteach de ionnsachadh agus teagasg agus planadh deagh ghnìomhan ionnsachaidh don h-uile neach-ionnsachaidh. Tha e a’ sònrachadh an fheum air luchd-ionnsachaidh, pàrantan agus luchd-teagaisg a bhith ag obrachadh còmhla a’ suidheachadh thargaidean airson ionnsachaidh. Tha e cuideachd co-cheangailte ri dleastanas luchd-teagaisg airson dèanamh cinnteach gun dèan a h-uile neach-ionnsachaidh adhartas iomchaidh.

ÌRE 5 EISIMPLEIR

• Tha ar measadh a’ gabhail a-steach deagh eadar-obrachadh planaichte le luchd-ionnsachaidh agus tha e stèidhichte air ceistean domhain agus rannsachail co-cheangailte ri builean ionnsachaidh. Bidh sinn a’ cleachdadh diofar dhòighean airson toirt orra pàirt a ghabhail ann am beachdachadh mu thuigse agus adhartas. Bidh sinn a’ toirt deagh fhiosrachadh air ais do luchd-ionnsachaidh agus gan cuideachadh a’ tuigsinn nan ath cheuman anns an ionnsachadh. ’S urrainn don luchd-ionnsachaidh againn measadh a dhèanamh air an adhartas aca fhèin agus bidh iad a’ gabhail pàirt gu cunbhalach ann am measadh air comhaoisean. Bidh sinn a’ dèanamh atharrachadh rè leasain ris an teagasg againn agus ris an taic a tha sinn a’ toirt gus am bi freagairtean luchd-ionnsachaidh air an gabhail a-steach.
• Bidh sinn a’ planadh deagh shuidheachaidhean ionnsachaidh a’ cleachdadh ar tuigse air ionnsachadh agus leasachadh chloinne agus air na builean ionnsachaidh. Tha sinn a’ tuigsinn agus a’ dèiligeadh ri feuman fa leth, a’ toirt taic do chomasan agus thàlantan sònraichte, agus a’ togail air na chaidh ionnsachadh roimhe.
• Bidh sinn a’ cleachdadh fiosrachadh bho mheasadh gu math airson measadh air ionnsachadh agus teagasg agus leasachadh air ar cleachdadh. Bidh sinn a’ coimhead gu dlùth ri luchd-ionnsachaidh. Bidh sinn a’ beachdachadh air ar measaidhean agus gan co-roinn ri co-oibrichean gus an tig sinn gu aonta mu ìrean seasmhach, gun cùm sinn cunntas air adhartas agus gum bi sinn a’ cleachdadh an fhiosrachaidh airson ionnsachadh ri teachd a phlanadh. Tha làn chom-pàirt aig luchd-ionnsachaidh ann am beachdachadh mu dè a dh’ionnsaicheas iad agus ciamar a nì iad adhartas.
• Tha ullachadh ion-obrachail againn airson clàradh a tha gar cuideachadh a’ cumail agus a’ toirt cunntas air adhartas luchd-ionnsachaidh. Bidh pàrantan a’ faighinn fiosrachadh ùr gu cunbhalach, a’ gabhail a-steach aithisgean sgrìobhte, mu adhartas na cloinne aca tron chlàr-teagaisg, an coileanadh san fharsaingeachd agus feuman aoghaireil, agus an neartan agus an ath cheuman anns an ionnsachadh. Tha ìre mhòr com-pàirt aig luchd-ionnsachaidh agus pàrantan ann an ullachadh airson aithisgean agus tha seo a’ cuideachadh a’ suidheachadh thargaidean ionnsachaidh.

ÌRE 2 EISIMPLEIR

• Ged a tha dealbh farsaing againn de adhartas luchd-ionnsachaidh, uaireannan tha seo stèidhichte air beagan dhòighean-obrach. Chan eil sinn daonnan a’ toirt com-pàirt do luchd-ionnsachaidh ann am beachdachadh mu na measaidhean againn no a’ toirt deagh fhiosrachadh air ais dhaibh. Chan eil luchd-ionnsachaidh ro dheònach measadh a dhèanamh air an adhartas aca fhèin. Cha bhi sinn daonnan a’ dèiligeadh gu gnìomhach ri freagairtean luchd-ionnsachaidh rè leasain.
• Bidh sinn a’ planadh suidheachaidhean ionnsachaidh gu cùramach ach chan eil sinn gan dèanamh freagarrach gu leòr a’ cleachdadh ar tuigse air ionnsachadh agus leasachadh chloinne no bunan fiosrachaidh mar spèisealaichean agus tidsearan taic.
• Bu chòir dhuinn feum nas fheàrr a dhèanamh de fhiosrachadh bho mheasadh gus ar cleachdadh a leasachadh. Ann an cuid de raointean tha sinn a’ dèanamh cus measadh. Bidh sinn a’ cumail cunntas air adhartas luchd-ionnsachaidh agus a’ cleachdadh cuid den fhiosrachadh a tha againn airson planadh, ach chan eil luchd-ionnsachaidh daonnan a’ tuigsinn dè thathar a’ sùileachadh bhuapa ionnsachadh no ciamar a nì iad adhartas.
• Chan eil ar n-ullachadh airson clàradh a’ cumail cunntas air ceuman cudromach ann an adhartas luchd-ionnsachaidh ann an dòigh ion-obrachail. Bidh sinn ag innse do phàrantan agus luchd-ionnsachaidh mu ìrean adhartais san fharsaingeachd, ach cha bhi mun dòigh as fheàrr air adhartas a dhèanamh. Tha pàrantan mì-chinnteach mu chuid den bhriathrachas a tha sinn a’ cleachdadh. Cha bhi sinn a’ toirt fiosrachadh gu cunbhalach mu choileanadh luchd-ionnsachaidh san fharsaingeachd.

CUSPAIREAN

• Sùileachadh luchd-teagaisg agus cleachdadh molaidh
• Sùileachadh agus mothachadh air coileanadh luchd-ionnsachaidh
• Àrdachadh agus cumail suas spiorad coileanaidh
• Dàimhean tidsear-sgoilear

PRÌOMH CHOMHARRAN:

Tha an comharra seo co-cheangailte ri sùileachadh luchd-teagaisg agus luchd-ionnsachaidh, agus an ìre gu bheil an sgoil a’ brosnachadh spiorad coileanaidh airson a h-uile neach-ionnsachaidh. Tha e a’ cur cudrom air sùileachadh a tha dùbhlanach ach so-ruigsinn airson luchd-ionnsachaidh agus air moladh agus comharrachadh a’ choileanaidh. Tha e a’ sònrachadh spiorad coileanaidh anns a bheil spèis aig luchd-teagaisg agus luchd-ionnsachaidh do chàch a chèile.

ÌRE 5 EISIMPLEIR

• Tha coimhearsnachd na sgoile againn misneachail a thaobh a comas air coileanadh. Bidh sinn a’ suidheachadh ìrean àrda airson coileanadh, frithealadh agus giùlan luchd-ionnsachaidh agus gan co-roinn ri luchd-ionnsachaidh agus pàrantan. Tha an dòigh anns a bheil sinn a’ cleachdadh moladh breithneachail agus tuigseach. Tha e a’ cuimseachadh air coileanadh pearsanta luchd-ionnsachaidh fa leth agus buidhnean de luchd-ionnsachaidh.
  Tha luchd-ionnsachaidh a’ faighinn toileachas agus misneachd bho mholadh air a bheil iad airidh.
• Tha luchd-ionnsachaidh a’ sùileachadh ìrean àrda bhuapa fhèin agus bho dhaoine eile. Tha iad mothachail air coileanadh agus a’ gabhail gu math ri cothroman airson uallach a ghabhail. Tha an obair aca air a thaisbeanadh ann an clasaichean, ann an raointean poblach agus, far an gabh e dèanamh, anns a’ choimhearsnachd. Tha coileanadh luchd-ionnsachaidh anns a’ choimhearsnachd air a mheas agus air a chomharrachadh san sgoil againn.
• Tha fios againn gun urrainn do na h-uile ionnsachadh agus dèanamh adhartas. Tha seo ri fhaicinn nar beachdan agus nar n-obair. Bidh sinn a’ dèanamh ar dìcheall gus dèanamh cinnteach nach eil luchd-ionnsachaidh ann an cunnart call a-mach air cothroman foghlaim. Tha sinn a’ toirt cothrom do luchd-ionnsachaidh a bhith soirbheachail. Tha àrd-mhiannan ar luchd-ionnsachaidh ri fhaicinn anns na beachdan deimhinneach aca mu obair-cùrsa, coileanadh agus leasachadh. Bidh sinn a’ cleachdadh iomadh seòrsa dòigh airson cunntasan agus comharrachadh air soirbheachadh dhaoine fa leth, bhuidhnean de daoine òga agus luchd-teagaisg agus coimhearsnachd na sgoile againn gu h-iomlan.
• Tha dàimhean tro choimhearsnachd na sgoile math agus stèidhichte air spiorad spèis dhaibh fèin agus do chàch a chèile taobh a-staigh mothachadh làidir air coimhearsnachd agus air luachan coitcheann. Tha clann agus daoine òga modhail agus a’ nochdadh urram do dhaoine eile.

ÌRE 2 EISIMPLEIR

• Uaireannan tha ar sùileachadh airson coileanadh, frithealadh agus giùlan luchd-ionnsachaidh ro ìosal. Chan eil sinn seasmhach ann an cleachdadh moladh mar phàirt brosnachail agus deimhinneach de bheatha na sgoile agus chan eil sinn daonnan soirbheachail ann an adhartachadh deagh ghiùlan. Tha seo a’ cur ri coileanadh ìosal agus cion ùidh airson cuid den luchd-ionnsachaidh.
• Tha cus den luchd-ionnsachaidh againn a’ meas gu bheil an comas ìosal. Tha cuid dhiubh nach eil misneachail a thaobh an comasan air coileanadh no gabhail uallach. Cha bhi sinn a’ toirt targaidean dùbhlanach ach so-ruigsinn do luchd-ionnsachaidh a bheir cothrom dhaibh mothachadh fhaighinn air coileanadh. Chan eil mòran comharrachaidh air coileanadh luchd-ionnsachaidh anns a’ choimhearsnachd.
• Chan urrainn dhuinn uile spiorad coileanaidh a bhrosnachadh tron sgoil againn. Tha ar n-àrainneachd ionnsachaidh taiceil ach chan eil e brosnachail agus chan eil luchd-ionnsachaidh a’ nochdadh ach beagan tograidh airson an coileanadh a leasachadh. Ged a tha luach air a chur air deagh choileanadh ann an cuid de raointean, chan eil sinn a’ leudachadh seo tro gach pàirt de bheatha na sgoile. Chan eil sinn a’ toirt aire gu leòr do chomharrachadh no
  co-roinn coileanadh luchd-ionnsachaidh.
• Tha dàimhean tidsear-sgoilear math sa chumantas ach chan eil iad daonnan stèidhichte air urram agus earbsa. Tha am faireachdainn ann an clasaichean iomchaidh ann an grunn dhòighean ach chan eil e daonnan sàmhach no torach agus uaireannan tha am modh-giùlain truagh.

CUSPAIREAN

• Modhan in-ghabhail
• Brosnachadh co-ionannachd agus cothromachd
• Daingneachadh co-ionannachd agus cothromachd

PRÌOMH CHOMHARRAN:

Tha an comharra seo co-cheangailte ri na rinn an sgoil airson brosnachadh agus daingneachadh mothachadh làidir air co-ionannachd agus cothromachd tron chlàr-teagaisg agus anns gach roinn den obair aice. Tha e a’ cur cudrom air pàirt luchd-teagaisg anns an sgoil ag obair còmhla ri buidhnean com-pàirteachais gus dèanamh cinnteach gu bheil a h-uile neach-ionnsachaidh air a ghabhail a-steach ann am beatha na sgoile. Tha e a’ dèanamh cinnteach gu bheil meas air a chur air iomadachd taobh a-staigh agus taobh a-muigh coimhearsnachd na sgoile¹⁷.

ÌRE 5 EISIMPLEIR

• Tha fàilte air an luchd-ionnsachaidh againn uile agus am pàrantan san sgoil agus thathar ag ath-sgrùdadh nam feuman aca agus a’ coinneachadh riutha le luchd-teagaisg ag obair far am bi e iomchaidh còmhla ri seirbheisean
  com-pàirteachais. Tha sinn soirbheachail ann an lùghdachadh bacaidhean ri leasachadh agus ionnsachadh agus a’ dèanamh cinnteach gu bheil luchd-ionnsachaidh agus am pàrantan air an làn ghabhail a-steach ann am beatha na sgoile againn. Tha cultar againn de in-ghabhalachd, com-pàirteachaidh agus deagh ghiùlan stèidhichte air urram. Bidh sinn a’ toirt ceumannan airson com-pàirt a thoirt do luchd-ionnsachaidh a tha mì-thoilichte agus an teaghlaichean agus a’ toirt cothrom dhaibh air soirbheachadh agus in-ghabhail anns an sgoil. Tha sinn a’ cumail sùil shònraichte air luchd-ionnsachaidh so-leònte.
• Tha sinn a’ cur cudrom mòr air a bhith a’ cur luachan an gnìomh. Thathar a’ sùileachadh gum bi luchd-teagaisg agus sgoilearan a’ nochdadh uallach pearsanta, co-fhaireachdainn agus taic do dhaoine eile, agus a’ brosnachadh cothromachd agus ceartas nan eadar-obrachadh le càch a chèile. Bidh sinn a’ brosnachadh co-ionannachd cothruim agus ruigsinneachd san obair againn. Tha sinn a’ toirt àite, luach agus brosnachadh do iomadachd san sgoil againn agus a coimhearsnachd le cudrom air nithean coitcheann nar luachan agus eòlas. Bidh sinn a’ dèanamh beachdachadh fosgailte agus feumail air cùisean co-ionannachd. Tha ar luchd-ionnsachaidh a’ faireachdainn misneachail mu aithneachadh agus cur aghaidh air lethbhreith.
• Tha sinn a’ cur fàilte air iomadachd agus ga chomharrachadh. Thathar a’ dèiligeadh ri luchd-ionnsachaidh, pàrantan, agus luchd-teagaisg le urram agus ann an dòigh chothromach agus cheart. Anns an sgoil againn, cha chuir cultar agus cànan, ciorram, gnè, cinneadh, creideamh, taobh feise agus feuman taic a bharrachd bacadh air com-pàirteachadh agus coileanadh.

ÌRE 2 EISIMPLEIR

• Bidh sinn a’ gluasad gus cur às do bhacaidhean air ionnsachadh, ach tha mòran luchd-ionnsachaidh a’ faireachdainn nach eil luach air a chur orra mar phàirt de choimhearsnachd na sgoile againn. Bidh sinn ag obair còmhla ri seirbheisean com-pàirteachais ach uaireannan cha bhi e dlùth gu leòr gus dèanamh cinnteach gu bheil an sgoil a’ comharrachadh agus a’ coinneachadh ri feuman a h-uile neach-ionnsachaidh. Tha cuid de luchd-ionnsachaidh agus an teaghlaichean a’ faireachdainn nach eil iad air an in-ghabhail, no nach urrainn dhaibh làn chom-pàirt a ghabhail ann am beatha na sgoile againn.
• Chan eil co-ionannachd cothruim agus mothachadh air cothromachd follaiseach ann an obair na sgoile againn. Chan eil sinn a’ dèanamh soilleir gu leòr gu bheil sinn a’ cur meas air iomadachd cinnidh, creideimh, cultair agus cànain no gu bheil sinn a’ brosnachadh leantainneachd thar bhuidhnean. Tha cuid de bhuidhnean luchd-ionnsachaidh fo-riochdaichte ann an tachartasan sgoile. Chan eil luchd-ionnsachaidh ullaichte airson brosnachadh no àite a thoirt do cho-ionannachd agus cothromachd agus dèiligeadh ri lethbreith nam beatha anns na bliadhnachan ri thighinn.
• Bidh sinn a’ strì ri ceartas agus spèis a nochdadh do luchd-ionnsachaidh, pàrantan, agus luchd-teagaisg ach feumaidh sinn sgrùdadh agus measadh nas riaghailtiche a dhèanamh air ar soirbheachadh anns na raointean sin. Tha luchd-obrach eadar-dhealaichte anns an ìre cudruim a tha sinn a’ cur air cùisean co-ionannachd agus cothromachd. Tha luchd-obrach, luchd-ionnsachaidh agus luchd-tadhail san sgoil againn a’ faireachdainn sàbhailte agus tèarainte, ach chan eil cuid dhiubh cinnteach dè an ìre meas a tha dha-rìreabh air a chur orra.

CUSPAIREAN

• Com-pàirt do phàrantan ann an ionnsachadh na cloinne aca agus beatha na sgoile
• Co-chomhairle agus conaltradh ri luchd-ionnsachaidh agus pàrantan
• Còmhradh ri luchd-ionnsachaidh agus pàrantan mu obair na sgoile

PRÌOMH CHOMHARRAN:

Tha an comharra seo co-cheangailte ri co-obrachadh na sgoile le pàrantan, luchd-cùraim agus teaghlaichean a thaobh buaidh air ionnsachadh agus adhartas. Tha e a’ sònrachadh mar a tha an sgoil a’ cur luach air a h-uile pàrant agus mar a tha iad a’ cuideachadh a’ toirt taic don ionnsachadh mar phàirt bhunaiteach de cho-obrachadh soirbheachail. Tha e a’ cur cudrom air obair na sgoile ann am brosnachadh com-pàirt phàrantan ann an ionnsachadh na cloinne aca, a’ sireadh agus a’ cur an gnìomh beachdan phàrantan agus a’ toirt fiosrachaidh dhaibh mu obair na sgoile.

ÌRE 5 EISIMPLEIR

• Tha ar dòighean-obrach airson com-pàirt do phàrantan planaichte agus gnothaicheil agus a’ leantainn gu co-obrachadh buannachdail le daoine agus le buidhnean riochdachail de phàrantan ann an ionnsachadh na cloinne agus beatha na sgoile againn. ’S e sgoil aoigheil a tha anns an sgoil againn. Bidh sinn ag iarraidh air pàrantan pàirt a ghabhail ann an cùram agus foghlam na cloinne aca, gu sònraichte an fheadhainn nach eil cho deònach com-pàirteachadh no air am bacadh bho chom-pàirteachadh. Tha sinn a’ toirt taic mhath do phàrantan gu tuigsinn agus gabhail pàirt ann am beachdachadh mu adhartas na cloinne aca agus dòighean air obrachadh còmhla air an ath cheuman ann an ionnsachadh. Cho fada ’s a ghabhas, bidh sinn a’ coinneachadh ri pàrantan aig na h-uairean as freagarraiche dhaibhsan.
• Tha meadhanan againn airson conaltradh agus co-chomhairle ri pàrantan agus luchd-ionnsachaidh mu chàileachd an fhoghlaim agus an dòigh a tha ar sgoil air a ruith, a’ dèanamh feum mhath de choinneachadh aghaidh-ri-aghaidh, litrichean-naidheachd, post-dealain, làraich-lìn agus fòn. Tha buidhnean a’ riochdachadh luchd-ionnsachaidh agus pàrantan an sàs ann an co-dhùnaidhean mu obair na sgoile againn san àm ri teachd. Tha modhan gearain soilleir againn agus tha pàrantan a’ tuigsinn ciamar a chleachdar iad. Bidh iad a’ faighinn fiosrachadh air ais, agus nuair nach gabhar ri na molaidhean aca thathar ag innse dhaibh carson. Tha ullachadh èifeachdach againn airson coinneachadh ri feuman eadar-dhealaichte nam pàrantan, mar eisimpleir, an fheadhainn a dh’fheumas seirbheisean mìneachaidh no eadar-theangachaidh no air a bheil uireasbhaidh a thaobh comas-gluasaid, fradharc no claisneachd.
• Bidh sinn a’ toirt cunntas do phàrantan agus luchd-ionnsachaidh gach bliadhna air ar prìomh-amasan leasachaidh agus prìomh bhuilean. Bidh sinn a’ toirt fiosrachadh soilleir ann an cruthan freagarrach mu phrìomh roinnean den obair againn. Tha ar n-aithisgean ìrean agus càileachd a’ toirt measaidhean pongail air prìomh roinnean den obair againn agus a’ comharrachadh neartan agus raointean airson leasachaidh. Tha sinn a’ cur fàilte air pàrantan a bhios a’ togail cheistean agus a’ com-pàirteachadh ann an leasachadh san sgoil nach buin do fheuman na cloinne aca fhèin.

ÌRE 2 EISIMPLEIR

• Bidh sinn a’ tabhann gnìomhan agus taic do phàrantan agus buidhnean riochdachail ach chan eil sinn a’ toirt
  com-pàirt dhaibh ann an dòigh phlanaichte agus ghnothaicheil. Bidh sinn a’ misneachadh phàrantan a bhith an sàs ann an ionnsachadh na cloinne aca, mar eisimpleir tro obair-dachaigh, ach chan eil sinn a’ toirt stiùireadh gu leòr airson an cuideachadh a’ toirt taic don chloinn. Tha sinn a’ cur fàilte air na pàrantan a tha a’ gabhail pàirt ann am beatha na sgoile ach cha tug sinn com-pàirt don h-uile pàrant. Tha leisg no eagal air cuid de phàrantan ceangal ris an sgoil. Chan eil ar n-ullachadh airson coinneamhan eadar luchd-teagaisg agus pàrantan sùbailte gu leòr airson coinneachadh ri feuman bhuidhnean de phàrantan.
• Tha sinn a’ cleachdadh diofar mhodhan airson conaltradh ri pàrantan agus luchd-ionnsachaidh, ach chan eil dòighean riaghailteach againn air a bhith a’ faighinn am beachdan airson ar sgoil a leasachadh. Bidh sinn a’ conaltradh gu math ris a’ chuid as motha de phàrantan ach chan eil sinn air dòighean a dhealbh airson ruigsinn an fheadhainn le mion-chànanan agus buidhnean phàrantan eile. Cha bhi sinn a’ toirt fiosrachadh air ais do phàrantan nuair nach tèid gabhail ri na molaidhean aca agus chan eil cuid dhiubh a’ faireachdainn gu bheil com-pàirt aca ann an
  co-dhùnaidhean mu obair na sgoile againn san àm ri teachd. Chan eil pàrantan cinnteach ciamar a thogas iad ceistean no gearanan.
• Bidh sinn a’ toirt cunntas do phàrantan agus luchd-ionnsachaidh mu choileanadh agus raointean airson leasachaidh ann an roinnean de obair na sgoile againn ach tha luach an fhiosrachaidh do phàrantan air a lùghdachadh tro, mar eisimpleir, droch fhoillseachadh, cion soilleireachd no beàrnan ann am fiosrachadh mu phrìomh raointean.

CUSPAIREAN

• Ullachadh airson cùram, sochair agus dìon chloinne a dhaingneachadh
• Modhan agus solarachadh airson coinneachadh ri feuman faireachail, corporra agus sòisealta chloinne agus dhaoine òga
• Stiùireadh mun chlàr-teagaisg agus mu dhreuchdan

PRÌOMH CHOMHARRAN:

ÌRE 5 EISIMPLEIR

• Tha ar poileasaidhean airson cùram aoghaireil agus sochair soilleir, iomchaidh agus air an cur an gnìomh. Tha coimhearsnachd na sgoile againn gu lèir a’ com-pàirteachadh ann an adhartachadh cùram agus sochair dhaoine eile. Tha sinn a’ tuigsinn ar pàirtean agus dleastanas ann an daingneachadh slàinte agus sàbhailteachd. Tha sinn air trèanadh fhaighinn ann an cùisean dìon chloinne agus tha sinn a’ cur earbsa annta. Bidh sinn a’ dèiligeadh gu faiceallach agus gu h-èifeachdach ri feuman agus draghan chloinne, agus tha cothrom aig ar luchd-ionnsachaidh air modhan gearain èifeachdach. Bidh sinn a’ cur dòigh-beatha fhallain agus brosnachadh slàinte a-steach ann an cultar na sgoile againn. Tha modhan soilleir aig an sgoil againn airson sgrùdadh air inbhich a bhios ann an obair le cloinn.
• Tha sinn mothachail air feuman faireachail, corporra agus sòisealta chloinne agus a’ toirt àite agus brosnachadh don leasachadh pearsanta agus sòisealta aca tron obair againn gu lèir. Bidh sinn a’ toirt geur aire dhaibh aig amannan gluasaid.
• Thathar ag iarraidh air luchd-ionnsachaidh an coileanadh san fharsaingeachd, coimhead às dèidh daoine eile agus leasachadh sgilean saoranachd a leudachadh. Tha earbsa, urram agus misneachd anns an sgoil againn.
  Tha luchd-teagaisg agus seirbheisean com-pàirteachais, a’ gabhail a-steach goireasan sa choimhearsnachd, a’ toirt taic do chloinn agus an teaghlaichean. Bidh sinn a’ làimhseachadh fiosrachadh mu daoine fa leth gu faiceallach.
• Tha luchd-ionnsachaidh for-ghnìomhach ann an leasachadh bheachdan mun bheatha aca san àm ri teachd agus tha iad air na sgilean agus eòlas a thogail airson an dreuchdan a phlanadh gu h-èifeachdach agus eòlas fhaighinn air saoghal na h-obrach. Tha ar stiùireadh mu dhreuchdan stèidhichte air co-chomhairle freagarrach agus air fiosrachadh agus comhairle ceart, iomchaidh agus ùr.

ÌRE 2 EISIMPLEIR

• Ged a bhios sinn sa chumantas a’ feuchainn ri àrainneachd shàbhailte agus dhàimheil ullachadh, tha laigsean nar cleachdadh. Tha ar poileasaidhean a’ fàgail às roinnean de chùram agus sochair no chan eil iad air an làn bhuileachadh leis a h-uile neach-obrach. Tha beagan mothachaidh aig luchd-obrach air cùisean dìon chloinne ach b’ fheàirrde iad tuilleadh trèanaidh. Chan eil ar poileasaidhean, mar eisimpleir an aghaidh burraidheachd, gràin-cinnidh, mì-ghnàthachadh dhrugaichean agus cleachdadh an eadar-lìon gu sàbhailte, soilleir no chan eil iad air an làn bhuileachadh. Tha sinn a’ toirt fainear cùisean slàinte ach chan eil sinn daonnan gan cur an gnìomh. Ged a tha sinn a’ dèiligeadh gu dìcheallach ri feuman agus iomagainean dhaoine fa leth, uaireannan bidh sinn a’ dearmad còraichean chloinne a thaobh an cùisean a chumail dìomhair, urramach agus prìobhaideach. Chan eil cuid den luchd-ionnsachaidh cinnteach ciamar a chuireas iad an cèill am beachdan no an gearan. Chan eil ar modhan airson sgrùdadh air daoine daonnan soilleir gu leòr.
• Chan eil ar modhan airson leasachadh air sgilean pearsanta agus sòisealta luchd-ionnsachaidh air an co-òrdanachadh gu math. Chan eil cothroman aig a h-uile neach-ionnsachaidh coimhead às dèidh daoine eile no sgilean saoranachd a leasachadh. Aig amannan gluasaid, chan eil a h-uile sgoilear a’ faighinn làn thaic airson atharrachadh gu sòisealta no gu faireachail. Chan eil sinn a’ toirt gu leòr chothroman do luchd-ionnsachaidh air dleastanasan pearsanta no coileanadh san fharsaingeachd a leasachadh. Chan eil ar modhan airson cruthachadh suidheachadh anns a bheil earbsa, urram agus misneachd coitcheann làn èifeachdach. Tha eisimpleirean ann de chion spèis airson fiosrachadh mun luchd-ionnsachaidh agus mar a tha sinn a’ dèiligeadh ri na feuman faireachail aca.
• Chan eil luchd-ionnsachaidh daonnan a’ faighinn fiosrachadh agus comhairle ceart, iomchaidh agus ùr a bhios gan ullachadh airson roghainnean a dhèanamh ann am foghlam, trèanadh no cosnadh. Tha ar modhan airson luchd-ionnsachaidh a stiùireadh mu na roghainnean aca ann am foghlam cuingichte no aig àm mhì-fhreagarrach.
  Tha cothroman ann air eòlas obrach, stiùireadh mu dhreuchdan agus ionnsachadh mu shaoghal na h-obrach cuingichte a thaobh ìre no càileachd.

CUSPAIREAN

• Dealas a thaobh fèin-mheasaidh
• Rianachd fèin-mheasaidh
• Leasachadh sgoile

PRÌOMH CHOMHARRAN:

Tha an comharra seo co-cheangailte ri ullachadh na sgoile airson leasachadh tro fhèin-mheasadh agus a bhith dealasach mu dheidhinn. Tha e a’ sònrachadh cho cudromach ’s a tha e a bhith a’ tional agus a’ dèiligeadh ri beachdan a h-uile com-pàirtiche agus neach le ùidh san sgoil agus a’ toirt com-pàirt dhaibh. Tha e a’ cur cudrom air an ìre gu bheil eòlas math aig sgoil oirre fhèin agus mar a tha i a’ leasachadh soirbheachadh agus coileanadh luchd-ionnsachaidh, agus coimhearsnachd na sgoile san fharsaingeachd.

ÌRE 5 EISIMPLEIR

• Mar dhaoine fa leth agus le co-oibrichean, bidh sinn a’ dèanamh measadh air ar n-obair fhìn sa chlas mar chleachdaichean breithneachail agus a’ dèanamh leasachaidhean. Bidh sinn ag obair mar choimhearsnachd sgoile agus còmhla ri buidhnean com-pàirteachais airson measadh air an t-solarachaidh gus leasachadh leantainneach a thoirt gu buil, a’ gabhail a-steach atharrachadh mòr far am bi feum air. Tha siostaman fìor èifeachdach againn airson beachdan fhaighinn bho luchd-teagaisg, pàrantan, luchd-ionnsachaidh, com-pàirtichean agus daoine eile mu chàileachd na h-obrach againn. Tha sinn a’ co-obrachadh le seirbheisean eile do chloinn gus an dèan sinn leasachadh. Tha ar sealladh, luachan agus amasan air an cleachdadh mar bhunait airson ath-sgrùdadh na h-obrach againn.
• Tha ar fèin-mheasadh a’ cur cudrom air prìomh roinnean de shoirbheachadh agus choileanadh luchd-ionnsachaidh. Tha e a’ dèanamh feum de iomadh seòrsa comhairle agus fianais agus tha e mionaideach, riaghailteach agus follaiseach. Bidh ar sgioban uile a’ meòrachadh air cleachdadh làithreach agus a’ dèanamh measadh air iomairtean, smuaintean agus atharrachaidhean ùra sam bith a thug sinn a-steach. Far am bi e iomchaidh, bidh sinn a’ cleachdadh sgeamaichean barrantachaidh mar bhunait mhath airson leasachaidh. Bidh sinn a’ dèanamh comharrachadh soilleir air neartan agus raointean airson leasachaidh. Bidh sinn a’ co-roinn deagh chleachdadh.
• Tha coimhearsnachd na sgoile againn a’ gabhail modh aonaichte airson leasachadh anns gach nì a bhios i a’ dèanamh. Tha sinn dealasach mu bhith a’ toirt aire do thoraidhean bho fhèin-mheasadh agus tha dearbhadh soilleir againn air leasachadh stèidhichte air ar gnìomhan mar phàirt de ar fèin-mheasadh. Tha ar leasachaidhean a’ cur cudrom sònraichte air leasachaidhean leantainneach air ionnsachadh agus teagasg agus coileanadh a h-uile neach-ionnsachaidh.

ÌRE 2 EISIMPLEIR

• Mar luchd-teagaisg fa leth tha eadar-dhealachadh anns an ìre gu bheil sinn a’ dèanamh measadh èifeachdach air obair sa chlas. Tha sinn a’ coimhead fèin-mheasadh gu mòr mar dhleastanas phrìomh mhanaidsearan agus chan eil sinn a’ toirt gu leòr com-pàirt don h-uile neach-teagaisg, neach-ionnsachaidh, pàrant no com-pàirtiche. Feumaidh ar modhan fèin-mheasadh dealas agus obair-sgioba proifeiseanta nas làidire le cudrom air leasachadh càileachd na h-obrach againn.
• Bidh luchd-teagaisg àrdaichte a’ dèanamh measadh air obair na sgoile againn agus a sgioban ach tha iad a’ cleachdadh beagan mhodhan nach eil a’ cur cudrom gu leòr air soirbheachadh agus coileanadh ar luchd-ionnsachaidh airson measadh riaghailteach air èifeachdas. Uaireannan tha sinn neo-shoilleir no bidh beachdan againn mu na neartan agus raointean airson leasachaidh againn nach eil mionaideach gu leòr. Chan urrainn dhuinn sealltainn dè a’ bhuaidh a tha aig iomairtean air luchd-ionnsachaidh.
• Chan eil mòran buaidh aig fèin-mheasadh air toirt air adhart ionnsachadh agus teagasg agus coileanadh airson a h-uile neach-ionnsachaidh. Chan eil ar fianais mu na nithean sin daonnan a’ toirt prìomh fhiosrachadh stiùiridh agus chan eil e air a chleachdadh gu math airson measadh air adhartas agus planadh airson leasachaidh. Cha bhi sinn a’ dèanamh measadh riaghailteach air adhartas a dh’ionnsaigh coinneachadh ri targaidean anns a’ phlana leasachaidh. Bidh sinn a’ cleachdadh toraidhean bho fhèin-mheasadh airson aithisgean air ìrean agus càileachd ach tha an fhianais mì-chinnteach.

CUSPAIREAN

• Ruigse, soilleireachd agus freagarrachd amasan agus phoileasaidhean
• Cunbhalachd phoileasaidhean
• Riaghladh, measadh agus ùrachadh phoileasaidhean

PRÌOMH CHOMHARRAN:

’S ann a tha poileasaidhean mu dheidhinn gnìomhachd. Tha an comharra seo co-cheangailte ri feum air poileasaidhean pongail, soilleir a tha a’ comharrachadh prìomhachasan ionadail agus nàiseanta, a’ toirt treòrachadh coitcheann airson obair na sgoile agus a’ leasachadh solarachadh ann an clasaichean. Tha e a’ sònrachadh prìomh phàirt gach neach le ùidh san sgoil ann an dèanamh cinnteach gum bi poileasaidhean ag adhartachadh cunbhalachd nar n-obair le luchd-teagaisg agus com-pàirtichean eile. Tha e a’ cur cudrom air an ìre gu bheil poileasaidhean a’ comharrachadh sealladh, luachan agus amasan na sgoile agus a’ sònrachadh an fheum air cumail ag ùrachadh phoileasaidhean gus am bi iad a’ stiùireadh cleachdadh a leanas gu builean nas fheàrr do luchd-ionnsachaidh.

ÌRE 5 EISIMPLEIR

• Tha luchd-teagaisg, luchd-ionnsachaidh, pàrantan agus com-pàirtichean a’ co-roinn agus a’ cumail ri amasan agus luachan ar sgoile. Tha ar poileasaidhean a’ cur clann air thoiseach. Tha iad a’ toirt stiùireadh agus aire do phrìomhachasan ionadail agus nàiseanta agus do reachdas iomchaidh. Tha iad co-chòrdail ri amasan agus poileasaidhean an ùghdarras foghlaim no an luchd-stiùiridh agus ri poileasaidhean nàiseanta. Tha iad a’ toirt treòrachadh soilleir agus mionaideach a tha a’ leasachadh cleachdadh sa chlas.
• Tha poileasaidhean na sgoile againn ag amas air coinneachadh ri feuman luchd-ionnsachaidh agus lùghdachadh bacaidhean air ionnsachadh. Tha ar ceanglaichean obrach ri iomairtean bhuidhnean com-pàirteachais air an cur an cèill gu soilleir nar poileasaidhean sgoile agus follaiseach nar cleachdadh.
• Tha luchd-obrach, luchd-ionnsachaidh, pàrantan agus a’ choimhearsnachd an sàs ann an leasachadh agus sgrùdadh air ar poileasaidhean. Bidh sinn a’ cumail ag ùrachadh phoileasaidhean gus atharrachaidhean nar dòighean-obrach agus riatanasan ann an reachdas làithreach a chomharrachadh, gu sònraichte an fheadhainn co-cheangailte ri cùram, sochair agus dìon chloinne¹⁸.

ÌRE 2 EISIMPLEIR

• Chan eil na ceanglaichean eadar ar n-amasan agus ar poileasaidhean daonnan follaiseach do ar luchd-ionnsachaidh, pàrantan agus a’ choimhearsnachd. Chan eil ar poileasaidhean daonnan a’ toirt stiùireadh soilleir agus mionaideach airson luchd-teagaisg, luchd-ionnsachaidh, pàrantan agus com-pàirtichean gus an cuideachadh a’ daingneachadh cleachdadh agus lìbhrigeadh cunbhalach. Chan eil ar n-amasan a’ cur cudrom gu leòr air tabhann deagh shuidheachaidhean ionnsachadh agus toirt cothrom don h-uile neach-ionnsachaidh na h-ìrean as àirde a choileanadh.
• Chan eil ar poileasaidhean sgoile soilleir gu leòr mu ar pàirtean agus dleastanasan ann an coinneachadh ri feuman luchd-ionnsachaidh agus lùghdachadh bacaidhean air ionnsachadh. Chan eil na tha sinn a’ cur ri obair ann an com-pàirteachas soilleir agus tha seo a’ leantainn gu beàrnan anns an t-solarachadh airson cuid den luchd-ionnsachaidh.
• Chan eil sinn ag ath-sgrùdadh agus ag atharrachadh poileasaidhean tric gu leòr. Tha mòran de na poileasaidhean againn gun an ùrachadh gus atharrachaidhean ann an cleachdadh no reachdas no prìomhachasan nàiseanta agus ionadail a tha air atharrachadh a chomharrachadh. Chan eil mòran ceangail againn ri ar com-pàirtichean ann an ath-sgrùdadh phoileasaidhean airson dèanamh cinnteach gum bi na poileasaidhean a’ stiùireadh cleachdadh a leanas gu builean nas fheàrr airson luchd-ionnsachaidh.

CUSPAIREAN

• Com-pàirteachadh ann am poileasaidh agus planadh
• Conaltradh agus co-chomhairle

PRÌOMH CHOMHARRAN:

Tha an comharra seo co-cheangailte ris a h-uile com-pàirtiche (luchd-teagaisg, luchd-ionnsachaidh, pàrantan, buill den choimhearsnachd agus buidhnean com-pàirteachais) a bhith an sàs ann an leasachadh agus dealbhadh poileasaidh agus obair na sgoile san fharsaingeachd. Tha e a’ sònrachadh cho cudromach ’s a tha e a bhith a’ cumail fiosrachadh ri na com-pàirtichean uile mu obair agus leasachadh na sgoile, agus a bhith a’ cur comhairle riutha mu obair airson leasachaidh.

ÌRE 5 EISIMPLEIR

• Bidh sinn a’ cleachdadh beachdan agus eòlas a h-uile neach a tha an sàs ann an obair na sgoile againn airson leasachadh, measadh agus ath-sgrùdadh ar poileasaidhean agus planaichean a stiùireadh gus am faigh sinn leasachaidhean airson luchd-ionnsachaidh. Bidh pàirt gnìomhach aig luchd-teagaisg, luchd-ionnsachaidh, pàrantan, buidhnean com-pàirteachais agus com-pàirtichean eile ann an coinneamhan luchd-obrach, comhairlean sgoilear, buidhnean a’ riochdachadh phàrantan, buidhnean obrach, buidhnean sònraichte agus fòraman chom-pàirtichean eile.
• Tha sinn dealasach mu chonaltradh, co-chomhairleachadh agus co-obrachadh le sgioban luchd-obrach,
  luchd-ionnsachaidh, pàrantan agus com-pàirtichean agus tha ullachadh riaghailteach againn. Bidh sinn a’ dèanamh eadar-obrachadh cunbhalach le diofar bhuidhnean co-chomhairleachaidh iomchaidh agus tha stiùireadh soilleir againn airson conaltradh agus fiosrachadh air ais do na com-pàirtichean againn. Tha luchd-teagaisg,
  luchd-ionnsachaidh, pàrantan agus com-pàirtichean misneachail mu bheachdan, iomagainean agus mholaidhean a chur an cèill.

ÌRE 2 EISIMPLEIR

• ’S e glè bheag de structairean, mar coinneamhan, buidhnean obrach agus fòraman eile, a tha againn gus taic agus misneachd a thoirt do chom-pàirteachadh luchd-obrach, luchd-ionnsachaidh, pàrantan, buidhnean com-pàirteachais agus com-pàirtichean eile ann an toirt air adhart obair na sgoile againn. Chan eil cuid de phrìomh bhuidhnean de na com-pàirtichean againn an sàs gu leòr ann an dealbh poileasaidh sgoile ann an dòigh phlanaichte no ghnothaicheil. Chan eil ar com-pàirtichean daonnan a’ faireachdainn buntainneas ri poileasaidhean na sgoile againn, no ùidh annta.
• Bidh sinn a’ toirt fiosrachadh do luchd-ionnsachaidh, pàrantan agus luchd-teagaisg mun obair againn agus mun adhartas a rinn sinn ach chan eil am fiosrachadh daonnan soilleir, coileanta no ùraichte. Chan eil dòighean èifeachdach againn airson co-chomhairle agus conaltradh ri cuid de bhuidhnean chom-pàirtichean mar na buidhnean le mion-chànanan no an fheadhainn le ciorraman.

CUSPAIREAN

• Dealbh, buileachadh agus measadh phlanaichean leasachaidh
• Structair agus susbaint phlanaichean leasachaidh
• Cleachdadh fiosrachadh stiùiridh
• Co-phlanadh leasachaidh le buidhnean agus seirbheisean com-pàirteachais
• Planadh airson seasmhachd

PRÌOMH CHOMHARRAN:

Tha an comharra seo co-cheangailte ri ullachadh na sgoile airson planadh airson leasachaidh agus a bhuaidh¹⁹. Tha e a’ cur cudrom air modhan na sgoile airson planaichean agus measadh air am builean airson luchd-ionnsachaidh a thoirt gu buil. Tha e a’ sònrachadh an fheum air prìomhachasan soilleir stèidhichte gu daingeann air fiosrachadh bho fhèin-mheasadh. Tha e co-cheangailte ri planadh agus buileachadh eadar-bhuidheann gus leasachaidhean fhaighinn a bheir buannachd sa bhad agus san fhad-ùine.

ÌRE 5 EISIMPLEIR

• Tha cuairt shoilleir againn airson planadh leasachaidh. Bidh sinn a’ toirt a-steach com-pàirtichean aig ìre thràth airson cumadh a thoirt air ar planaichean. Tha luchd-teagaisg an sàs ann an dealbh ar plana leasachaidh agus ga chur an gnìomh. Ann an leasachadh, cur an gnìomh agus measadh ar planaichean, tha sinn a’ cleachdadh modhan adhartach airson measadh air cunnart. Bidh sinn a’ dèanamh measadh mionaideach air buaidh a’ phlana air leasachadh builean airson luchd-ionnsachaidh.
• Tha plana leasachaidh na sgoile againn a’ làn chomharrachadh sealladh coitcheann na sgoile againn còmhla ri prìomhachasan ionadail agus nàiseanta agus ann an cumadh a nì e so-ruigsinn don luchd-pàirteachaidh againn gu lèir. Tha am plana a’ suidheachadh thargaidean dùbhlanach ach a ghabhas an coileanadh agus a’ sealltainn gu soilleir ciamar a bhios leasachaidhean air am maoineachadh, cò ris a bhios iad an urra, cuin a bhios iad air am buileachadh, am buaidh air luchd-ionnsachaidh agus ciamar a bhios soirbheachadh air a mheasadh agus air a chomharrachadh.
• Ann an deasachadh ar plana leasachaidh, bidh sinn a’ dèanamh feum èifeachdach de fhiosrachadh bho fhèin-mheasadh agus bho sgrùdadh agus leasachadh proifeiseanta. Gu sònraichte, bidh sinn a’ dèanamh feum de fhianais mu chàileachd an ionnsachaidh agus an teagaisg agus de choileanadh agus bhuileachadh luchd-ionnsachaidh.
• Tha ar dealas airson co-phlanadh le sgoiltean co-cheangailte, buidhnean agus seirbheisean com-pàirteachais follaiseach ann an cleachdadh obair amalaichte gus amasan leasachaidh a choileanadh. Tha làn phàirt aig ar com-pàirtichean ann am planadh gus dèanamh cinnteach gu bheil luchd-ionnsachaidh sàbhailte, fallain agus gu bheilear a’ coimhead às an dèidh; gum bi iad a’ coileanadh gu an làn chomas thar diofar sgilean; agus gum bi iad nam poball misneachail agus cùramach an sàs ann an cuideachadh nan coimhearsnachdan aca.
• Thug sinn fìor aire do chùisean leantainneachd agus seasmhachd ann am planadh leasachaidhean.

ÌRE 2 EISIMPLEIR

• Bidh sinn a’ gabhail pàirt ann am planadh leasachaidh ach chan eil e a’ cur cudrom gu leòr air leasachadh càileachd an ionnsachaidh agus meudachadh coileanadh luchd-ionnsachaidh. Bidh sinn a’ dèanamh beagan measaidh air pròiseactan leasachaidh ach feumaidh sinn barrachd cudruim a chur air na buannachdan dìreach do
  luchd-ionnsachaidh. Tha adhartas a dh’ionnsaigh cur an gnìomh prìomhachasan aig ìre sgoile, roinne agus sgioba neo-chunbhalach. Cha do lean cur an gnìomh phlanaichean gu leasachaidhean cudromach ann an eòlas, buileachadh no ìrean coileanaidh luchd-ionnsachaidh.
• Chan eil structair agus dreach a’ phlana leasachaidh againn soilleir no feumail mar sgrìobhainn obrach. Bidh àireamh ro mhòr no ro bheag de dh’amasan leasachaidh againn agus chan eil iad daonnan a’ cur cudrom air prìomhachasan cudromach airson na sgoile againn. Chan eil na targaidean nar planaichean leasachaidh, ar gnìomhan, ar dleastanasan agus ar raointean-ama soilleir. Chan eil sinn cinnteach ciamar a nì sinn measadh no comharrachadh air soirbheachadh ar planaichean.
• Chan eil ar modh planaidh bonntaichte air fiosrachadh bho fhèin-mheasadh, gealltanas càileachd, no mion-sgrùdadh air fiosrachadh mu choileanadh agus buileachadh. Bidh sinn a’ dèanamh beagan sgrùdaidh agus measaidh air càileachd an ionnsachaidh agus an teagaisg ach chan eil seo a’ cur cudrom air fèin-fhiosrachadh luchd-ionnsachaidh sa chlas mar bhun phrìomhachasan cudromach airson leasachaidh.
• Bidh sinn ag obair gu ìre còmhla ri sgoiltean co-cheangailte, buidhnean proifeiseanta, buidhnean taic agus buidhnean com-pàirteachais gus prìomhachasan a chomharrachadh agus pàirt a ghabhail ann an co-phlanadh. Ach, chan eil raointean airson co-obrachaidh daonnan air am mìneachadh gu soilleir anns a’ phlana agus chan eil com-pàirtichean daonnan mothachail air an dleastanasan fa leth ann an cur an gnìomh a’ phlana.
• Chan eil ar planadh leasachaidh a’ toirt gu leòr aire do dhaingneachadh ion-obrachadh phròiseactan san fhad-ùine.

CUSPAIREAN

• Solarachadh luchd-teagaisg
• Trusadh, fastadh agus inntrigeadh luchd-teagaisg
• Cùram agus sochair luchd-teagaisg
• Comharrachadh coileanaidh

PRÌOMH CHOMHARRAN:

Tha an comharra seo co-cheangailte ri solarachadh agus trusadh luchd-teagaisg agus èifeachdas an ullachaidh gus am bi an cùram agus sochair agus an deòin air an obair a dhèanamh air a dhaingneachadh. Tha e a’ cur cudrom air follaiseachd agus co-ionannachd agus cothromachd ann an trusadh luchd-teagaisg gu dreuchdan, agus air an ìre gu bheil soirbheachadh luchd-teagaisg air aithneachadh agus air a chomharrachadh san sgoil.

ÌRE 5 EISIMPLEIR

• Tha gu leòr luchd-teagaisg le sgilean agus teisteanasan againn agus gu leòr taic bho sheirbheisean spèisealta gus clàr-teagaisg agus ionnsachadh iomchaidh a thabhann don h-uile neach-ionnsachaidh, a’ gabhail a-steach an fheadhainn le feuman taic a bharrachd.
• Tha modhan trusaidh èifeachdach agus follaiseach aig an sgoil againn a tha co-chòrdail ri riatanasan laghail. Tha ar modhan fastaidh a’ toirt aire iomchaidh do na sgilean, na comasan agus an eòlas a dh’fheumar airson gach dreuchd. Tha modhan inntrigidh èifeachdach againn airson a h-uile neach-obrach ùr a’ gabhail a-steach tidsearan solair agus luchd-teagaisg sealach eile. Tha sinn ag obrachadh poileasaidh chothroman co-ionann èifeachdach ann an trusadh agus taic do luchd-teagaisg. Bidh sinn a’ làimhseachadh agus a’ sgrùdadh cùisean co-ionannachd agus cothromachd gu riaghailteach a’ gabhail a-steach far am bi e iomchaidh, cinnidheachd, creideamh, ciorram agus gnè.
• Tha modhan soilleir againn airson a bhith a’ suidheachadh nan ìrean giùlain, cùraim agus sochair a dh’fhaodas a h-uile neach-teagaisg a shùileachadh agus a tha air a shùileachadh bhuapa. Tha fios aig luchd-teagaisg air na dleastanasan agus còraichean agus còdan obrachaidh proifeiseanta a bhuineas dhaibh.
• Bidh sinn a’ toirt taic do luchd-teagaisg obrachadh gu an làn chomas agus a’ comharrachadh an coileanadh. Bidh an fheadhainn le dleastanasan ceannardais gu cunbhalach ag innse soirbheachadh luchd-teagaisg agus a’ sònrachadh a’ chleachdaidh as fheàrr.

ÌRE 2 EISIMPLEIR

• Tha ar diofar eòlas teagaisg a’ toirt cothrom air dèiligeadh ris a’ chlàr-teagaisg san fharsaingeachd ach tha beàrnan ann an cuid de raointean, mar tidsearan taic no luchd-teagaisg solair. Chan eil sinn a’ dèanamh an fheum as fheàrr no a’ gabhail làn chothrom air sgilean luchd-teagaisg bho bhuidhnean com-pàirteachais agus bhuidhnean eile gus taic a thoirt do fheuman luchd-ionnsachaidh fa leth.
• Mar as trice tha ar modhan trusaidh ag obrachadh gu math ach uaireannan chuireadh iad feum air barrachd ullachaidh agus saothair. Tha modhan inntrigidh luchd-teagaisg èifeachdach ach chan eil an ìre freagarrachaidh daonnan gu leòr airson taic a thoirt do fheuman inntrigidh agus leasachaidh diofar bhuidhnean luchd-teagaisg ag ullachadh airson nan dleastanasan aca. Uaireannan, cha bhi ar n-ullachadh airson taic a thoirt do thidsearan solair a’ dèanamh cinnteach gu bheil iad eòlach air modhan na sgoile againn agus comasach air obrachadh gu h-èifeachdach le na clasaichean a chaidh a shònrachadh dhaibh. Tha sinn a’ cur làn thaic ri co-ionannachd agus cothromachd ann an trusadh ach cha bhi sinn daonnan a’ dèanamh cinnteach gu bheil na prionnsapalan sin air an cur an gnìomh.
• Uaireannan tha ar poileasaidhean airson suidheachadh ìrean giùlain, cùraim agus sochair airson luchd-teagaisg neo-shoilleir agus neo-chunbhalach. Chan eil cuid den luchd-teagaisg cinnteach dè na dleastanasan agus còraichean agus còdan obrachaidh proifeiseanta a bhuineas dhaibh agus chan eil iad cinnteach dè dh’fhaodas iad a shùileachadh no dè a tha air a shùileachadh bhuapa.
• Uaireannan bidh luchd-teagaisg a’ faireachdainn nach eil an fheadhainn le dleastanasan ceannardais a’ cur meas gu leòr air an coileanadh agus nach eil spiorad comharrachadh soirbheachaidh san sgoil againn. Chan eil sinn a’ dèanamh mòran comharrachaidh foirmeil no poblach air soirbheachadh luchd-teagaisg.

CUSPAIREAN

• Freagarrachd agus soilleireachd raointean-dleastanais
• Cleachdadh luchd-teagaisg, a’ gabhail a-steach bhuidhnean com-pàirteachais
• Èifeachdas obair-sgioba
• Conaltradh

PRÌOMH CHOMHARRAN:

Tha an comharra seo co-cheangailte ri èifeachdas obair luchd-teagaisg fa leth agus ann an sgioban. Tha e cuideachd a’ cur cudrom air an ìre gu bheil ùghdarras air a thoirt do luchd-teagaisg obrachadh gu an làn chomas, agus tha an obair aca air a stiùireadh a dh’ionnsaigh leasachadh air builean airson luchd-ionnsachaidh. Tha e a’ sònrachadh nam modhan agus structairean a tha ag adhartachadh sealbh air, agus dealas airson, a’ cho-iomairt seo.

ÌRE 5 EISIMPLEIR

• Tha tuairisgeulan-obrach agus raointean-dleastanais soilleir a’ cur cudrom air feuman luchd-ionnsachaidh aig luchd-teagaisg, a’ gabhail a-steach an fheadhainn bho sheirbheisean com-pàirteachais. Tha ùghdarras, dùbhlan agus taic air a thoirt dhaibh. Tha structairean soilleir aig ar sgioban, le cudrom air gnìomhan, agus tha sinn a’ gabhail uallach airson measadh air an obair aca.
• Tha ar sgioba luchd-teagaisg air an cleachdadh gu h-èifeachdach gus coinneachadh ri feuman luchd-ionnsachaidh agus leasachadh air an t-solarachaidh. Bidh luchd-obrach mar luchd-teagaisg a bharrachd, luchd-teagaisg airson feuman taic a bharrachd agus luchd-cuideachaidh clas ag obair ann an clasaichean agus a’ cur gu h-èifeachdach ri adhartas ar luchd-ionnsachaidh. Bidh manaidsearan gnìomhachais agus luchd-obrach bho bhuidhnean com-pàirteachais a’ cur ri obair luchd-teagaisg agus prìomh mhanaidsearan agus a’ toirt cothrom dhaibh cudrom a chur air teagasg agus ionnsachadh.
• Tha sinn air modh co-obrachail agus colaisteach a stèidheachadh airson na h-obrach againn. Tha spiorad obair-sgioba agus com-pàirt proifeiseanta follaiseach taobh a-staigh na sgoile againn. Bidh sinn ag obair gu h-èifeachdach còmhla ri tidsearan-taice agus luchd-teagaisg spèisealta a bhios a’ tadhal san sgoil. Tha ar n-ullachadh airson ceangal am measg luchd-teagaisg a’ co-obrachadh le luchd-ionnsachaidh sònraichte soilleir agus air a chur an gnìomh gu h-èifeachdach. Bidh ceangal èifeachdach eadar tidsearan-clas agus tidsearan-taic, luchd-teagaisg spèisealta a bhios a’ tadhal san sgoil, speisealtaich eile, luchd-obrach slàinte agus luchd-proifeiseanta cùraim gus coinneachadh ri feuman luchd-ionnsachaidh.
• Tha na loidhnichean conaltraidh agus cunntachalachd airson luchd-teagaisg soilleir. Bidh sinn uile a’ gabhail uallach airson conaltradh, co-chomhairle agus co-roinn air fiosrachadh le co-oibrichean. Tha cothroman math againn bruidhinn air iomagainean no molaidhean feumail a dhèanamh. Tha an fheadhainn le dleastanasan ceannardais fosgailte, faicsinneach agus so-ruigsinn.

ÌRE 2 EISIMPLEIR

• Chan eil raointean-dleastanais soilleir aig cuid de luchd-teagaisg a’ mìneachadh am pàirt anns an sgioba san fharsaingeachd. Chan eil cuid de raointean-dleastanais a’ cuimseachadh gu math air feuman luchd-ionnsachaidh. Tha na tha luchd-teagaisg a’ cur ri obair na sgoile againn agus an com-pàirt ann an obair-sgioba eadar-dhealaichte a thaobh càileachd.
• Dh’fhaodar feum nas fheàrr a dhèanamh de na sgilean againn tro chleachdadh luchd-teagaisg nas fheàrr. Chan eil raointean-dleastanais agus gnìomhan obrach daonnan a’ leantainn prìomhachasan cudromach agus amasan leasachaidh na sgoile againn. Chan eil luchd-teagaisg daonnan a’ tuigsinn dleastanasan tidsearan-taic, luchd-cuideachaidh clas, luchd-teagaisg a bhios a’ tadhal san sgoil agus luchd-obrach bho sheirbheisean com-pàirteachais. Uaireannan bidh prìomh mhanaidsearan agus luchd-teagaisg a’ caitheamh ùine air gnìomhan làitheil a bu chòir a bhith dèante le daoine eile.
• Chan eil cleachdadh tidsearan-taic agus luchd-teagaisg spèisealta a bhios a’ tadhal san sgoil daonnan a’ co-fhreagairt feuman ar luchd-ionnsachaidh. Chan eil luchd-teagaisg a tha a’ co-obrachadh le cuid de luchd-ionnsachaidh no buidhnean de luchd-ionnsachaidh daonnan làn mhothachail air obair càch a chèile.
• Tha laigsean ann an conaltradh agus co-chomhairle am measg luchd-teagaisg agus sgioban a’ cuingealachadh an èifeachdais. Gu tric chan eil luchd-teagaisg cinnteach ciamar a gheibh iad air am beachdan agus draghan no molaidhean feumail a chur air adhart airson leasachadh seirbheis. Tha cuid den fheadhainn le dleastanasan ceannardais air am meas so-ruigsinn agus furasta bruidhinn riutha ach uaireannan bidh conaltradh neo-èifeachdach no co-chomhairle neo-iomchaidh mu chùisean cudromach a’ toirt buaidh air obair le luchd-ionnsachaidh.

CUSPAIREAN

• Modhan sgrùdaidh agus taic do luchd-obrach
• Trèanadh agus leasachadh
• Co-thrèanadh le luchd-teagaisg bho bhuidhnean com-pàirteachais

PRÌOMH CHOMHARRAN:

Tha an comharra seo co-cheangailte ri ullachadh na sgoile airson leasachadh agus sgrùdadh proifeiseanta luchd-obrach airson a h-uile neach-obrach fo riaghladh na sgoile. Tha e a’ cur cudrom air modhan soilleir agus riaghailteach airson sgrùdadh luchd-obrach a tha a’ faighinn taic bho iomadh seòrsa cothrom iomchaidh airson leasachadh. Tha e co-cheangailte ri co-thrèanadh a tha dealbhte airson adhartachadh air leasachadh proifeiseanta agus obair ann an com-pàirteachas èifeachdach²⁰.

ÌRE 5 EISIMPLEIR

• Tha an sgrùdadh luchd-obrach san sgoil againn a’ coinneachadh ris a’ chleachdadh as fheàrr. Tha e a’ comharrachadh neartan agus sgilean a h-uile neach-teagaisg agus a’ coinneachadh ri na feuman leasachaidh aca. Tha frèam soilleir de leasachadh proifeiseanta agus sgrùdadh leantainneach againn airson a h-uile neach-obrach a thathar a’ cleachdadh san sgoil againn agus tha deagh thaic aige. Tha fiosrachadh bho sgrùdadh luchd-obrach agus àiteachan eile a’ stiùireadh ghnìomhan leasachadh luchd-obrach agus a’ toirt taic do leasachadh leantainneach airson luchd-ionnsachaidh.
• Bidh sinn a’ gabhail uallach airson comharrachadh agus adhartachadh nan amasan agus prìomhachasan airson leasachadh proifeiseanta. Tha leasachadh luchd-obrach air a dheagh phlanadh, air a mhaidseadh ri feuman comharraichte dhaoine fa leth agus na sgoile agus a’ dèanamh feum de eòlas ionadail agus nàiseanta. Tha luchd-teagaisg mothachail air na h-amasan agus prìomhachasan airson leasachadh luchd-obrach agus ciamar a bhuineas iad sin do sgrùdadh agus leasachadh na sgoile. Tha leasachadh luchd-obrach a’ gabhail a-steach trèanadh nàiseanta agus ionadail iomchaidh, coimhead luchd-teagaisg, teagasg chomhaoisean agus comhairleachadh. Bidh sinn a’ leantainn agus a’ measadh na buaidh air ar cleachdadh sa chlas agus a’ cleachdadh an toraidh airson buaidh a thoirt air planadh san àm ri teachd.
• Tha ionnsachadh agus leasachadh proifeiseanta luchd-obrach co-obrachail agus colaisteach. Bidh luchd-teagaisg a’ tighinn còmhla airson tuigse a cho-roinn agus gabhail pàirt ann an leasachadh luchd-obrach coitcheann air prìomhachasan agus cleachdaidhean coitcheann. Tha leasachadh luchd-obrach coitcheann le seirbheisean com-pàirteachais a’ leantainn gu leasachaidhean anns an ullachadh airson taic a thoirt do luchd-ionnsachaidh agus an teaghlaichean.

ÌRE 2 EISIMPLEIR

• Tha modhan againn airson sgrùdadh luchd-obrach, ach chan eil sgrùdaidhean riaghailteach no èifeachdach gu leòr ann an comharrachadh feuman leasachaidh fa leth. Chan eil cuid den luchd-obrach cinnteach ciamar a nithear am feum as fheàrr den mhodh sgrùdaidh agus tha iad a’ meas nach eil e taiceil. Chan eil builean sgrùdadh luchd-obrach air an cleachdadh gu riaghailteach airson taic do leasachadh leantainneach ann an cleachdadh sa chlas.
• Chan eil cuid den luchd-teagaisg for-ghnìomhach ann an adhartachadh an leasachaidh aca fhèin. Cha bhi sinn daonnan a’ coinneachadh ri feuman leasachaidh fa leth no prìomhachasan sgoile agus uaireannan tha feuman bhuidhnean de luchd-teagaisg air an dearmad. Chan eil farsaingeachd gu leòr anns a’ phrògram againn airson trèanadh agus leasachadh agus chan eil e daonnan a’ dèanamh an fheum as fheàrr den eòlas a tha ri fhaotainn. ’S ann ainneamh a nithear measadh agus leantainn air a’ bhuaidh air an t-solarachadh airson luchd-ionnsachaidh.
• Bidh sinn a’ dèanamh beagan trèanaidh eadar-bhuidheann ach ’s e beagan tuigse a tha aig mòran de luchd-teagaisg na sgoile agus nan seirbheisean com-pàirteachais mu obair càch a chèile. Ged a bhios coinneamhan againn a’ gabhail a-steach luchd-teagaisg nan clasaichean àrda agus ar buidhnean com-pàirteachais, chan eil iad sin air am prògramadh gu cunbhalach no air an comharrachadh le clàran-gnothaich coitcheann. ’S ainneamh a bhios sinn a’ bruidhinn air co-thrèanadh no ga fhaicinn mar phrìomhachas. Chan eil seiseanan leasachadh luchd-teagaisg coitcheann a’ cur cudrom gu leòr air ciamar is urrainn dhuinn taic a thoirt do fheuman a h-uile neach-ionnsachaidh.

CUSPAIREAN

• Soilleireachd rùintean agus amasan
• Obrachadh anns gach buidheann agus cuspair
• Dleastanasan luchd-teagaisg ann an com-pàirteachasan

PRÌOMH CHOMHARRAN:

ÌRE 5 EISIMPLEIR

• Tha obair ann an com-pàirteachas èifeachdach againn a tha a’ dèanamh eadar-dhealachadh ri càileachd na taic do luchd-ionnsachaidh. Tha sinn soilleir mu na raointean airson a bheil sinn a’ gabhail a’ phrìomh uallaich agus an fheadhainn anns am feum sinn taic bho ar com-pàirtichean gus buannachdan do chloinn agus dhaoine òga fa leth a mheudachadh. Tha frèam soilleir againn le amasan iomchaidh agus modhan èifeachdach airson measadh air buaidh obair ann an com-pàirteachas air daoine agus buidhnean. Tha luchd-teagaisg dealasach airson amasan
  co-obrachaidh agus bidh iad ag obair còmhla ri com-pàirtichean, riochdairean agus buidhnean coimhearsnachd.
• Rinn ar ceanglaichean ri ionadan foghlaim eile, buidhnean agus fastaichean spèisealta agus sa choimhearsnachd neartachadh air an ionnsachadh agus leasachadh air coileanadh luchd-ionnsachaidh agus cuimseachadh air taic do dhaoine fa leth agus an teaghlaichean. Bidh luchd-teagaisg ag obair gu math còmhla ri daoine eile gus dèanamh cinnteach gu bheil taic mhath aig an fheadhainn as so-leònta agus gu bheilear a’ dèiligeadh ri na feuman ionnsachaidh agus sochair aca nuair a tha iad a’ gluasad gu sgoil eile. Tha sinn a’ toirt taic èifeachdach tro chom-pàirteachasan, far am bi e iomchaidh, le fastaichean, gnìomhachas, ionnsachadh agus leasachadh sa choimhearsnachd, Colaistean na h-Alba, buidhnean saor-thoileach, sìc-eòlaichean foghlaim, seirbheisean slàinte agus luchd-obrach sòisealta. Bidh luchd-teagaisg ag obair còmhla ri na com-pàirtichean sin gus comharrachadh an cuideachadh fa leth ann an neartachadh suidheachaidhean a h-uile neach-ionnsachaidh no cuimseachadh air taic do bhuidhnean agus do dhaoine. Bidh luchd-teagaisg a’ gabhail pàirt ann an iomairtean air an stiùireadh le buidhnean eile.
• Tha sinn soilleir mu na pàirtean agus dleastanasan fa leth againn agus tha cothroman fìor mhath againn coileanadh agus co-roinn trèanadh còmhla ri ar com-pàirtichean. Tha ar n-ullachadh airson conaltradh, measadh, planadh, sgrùdadh, clàradh agus aithisgean soilleir agus ag obrachadh gu math. Bidh sin ag obair còmhla ri com-pàirtichean a bhios a’ toirt seirbheisean amalaichte do chloinn agus pròiseactan stèidhichte sa choimhearsnachd gus prìomhachasan agus amasan ionadail a chomharrachadh.

ÌRE 2 EISIMPLEIR

• Ged a tha cuid de chom-pàirteachasan ag obrachadh gu math ann an coinneachadh ri feuman chloinne no dhaoine òga fa leth, tha comas ann airson cuideachadh nas motha bho chom-pàirteachasan eile. Chan eil seata amasan soilleir againn airson obair ann an com-pàirteachas agus ullachadh airson measadh dè a’ bhuaidh a tha aige.
  Tha mòran luchd-teagaisg dealasach airson amasan co-obrachaidh ach chan eil dòigh chunbhalach agus choileanta tron sgoil againn gu lèir.
• Chan eil ar ceanglaichean ri ionadan foghlaim, buidhnean coimhearsnachd agus spèisealta agus fastaichean eile daonnan air an cleachdadh gu h-èifeachdach gus an ionnsachadh a thoirt air adhart no taic a thoirt do leasachadh. Tha cuid de obair ann an com-pàirteachas a’ toirt glè bheag de bhuaidh air coinneachadh ri feuman luchd-ionnsachaidh. Tha ar lìonraidhean agus com-pàirteachasan a’ toirt taic èifeachdach do chuid de chloinn agus dhaoine òga ach chan eil sinn a’ coinneachadh gu math ri feuman fheadhainn eile.
• Tha sinn ag obair ann an com-pàirt le buidhnean reachdail ach chan eil sinn daonnan soilleir mu phàirtean agus dleastanasan chàch a chèile ann an obrachadh an com-pàirt. Tha laigsean ann an cuid de roinnean den ullachadh againn airson conaltradh, measadh, planadh, sgrùdadh, clàradh agus aithisgean. Tha cuid de obair com-pàirteachais a’ sealltainn diofar luchd-teagaisg ag obrachadh còmhla gu math ach uaireannan bidh sinn a’ leantainn nan dòighean-obrach, prìomhachasan agus amasan againn fhìn an àite a bhith a’ cur an gnìomh dòighean-obrach coitcheann.

CUSPAIREAN

• Riarachadh an ionmhais a tha ri fhaotainn agus suidheachadh bhuidseatan
• Modhan agus smachdan ionmhasail
• Rianachd bhuidseatan, a’ gabhail a-steach ceanglaichean ris an ùghdarras foghlaim/Bòrd-stiùiridh
• Cleachdadh ionmhais feabhas luach gus taic a thoirt do leasachadh na sgoile

PRÌOMH CHOMHARRAN:

Tha an comharra seo co-cheangailte ri buaidh solarachadh agus rianachd ionmhais na sgoile. Tha e a’ cur cudrom air follaiseachd, cothromachd agus feabhas luach ann an rianachd ionmhais na sgoile agus an ìre gu bheil cleachdadh stòras ionmhasail a’ leantainn gu builean nas fheàrr do luchd-ionnsachaidh.

ÌRE 5 EISIMPLEIR

• Tha ionmhas gu leòr againn airson taic a thoirt do obair na sgoile againn agus tha sinn a’ dèanamh an fheum as fheàrr den ionmhas a tha ri fhaotainn. Bidh sinn a’ sireadh bheachdan luchd-teagaisg, luchd-ionnsachaidh agus pàrantan mu iarrtasan maoineachaidh agus tha ceangal soilleir aca ri feuman na sgoile, amasan leasachaidh ionadail agus prìomhachasan nàiseanta.
• Tha modhan soilleir againn airson smachd ionmhasail. Tha riaghladh agus cumail sùil air ar caiteachas air a dhèanamh gu fosgailte agus gu h-èifeachdach agus a’ toirt aire do chomhairle ionadail agus nàiseanta.
• Tha siostaman fiosrachadh stiùiridh a’ toirt dhuinn dàta coileanta agus làithreach airson rianachd buidseit agus riarachadh stòrais. Tha ar n-ullachadh airson rianachd ionmhasail làitheil a’ toirt barrachd ùine do phrìomh mhanaidsearan agus luchd-teagaisg.
• Tha ar prìomhachasan airson cleachdadh stòras ionmhasail ceangailte gu soilleir ri prìomh-amasan leasachaidh na sgoile againn. Bidh sinn a’ cleachdadh ar n-ionmhais airson leasachadh air càileachd an ionnsachaidh agus taic a thoirt do leasachaidhean sònraichte. Tha ar coileanadh ionmhasail a’ sealltainn gun robh buidseat na sgoile againn air a chleachdadh gu comasach airson taic do na prìomh-amasan leasachaidh againn agus gun do lean iad sin gu builean math don luchd-ionnsachaidh againn²¹.

ÌRE 2 EISIMPLEIR

• Tha ar n-ionmhas air a chleachdadh airson taic a thoirt do obair na sgoile againn ach cha bhi sinn a’ cur comhairle iomchaidh ri cuid de luchd-teagaisg mu ullachadh ionmhasail agus chan eil ar stòras ionmhasail daonnan air a mhaidseadh ri coileanadh amasan leasachaidh na sgoile. Cha bhi sinn tric a’ dèanamh beachdachadh domhain gu leòr air iarrtasan airson pròiseactan ceangailte ri prìomhachasan ionadail agus nàiseanta.
• Chan eil ar modhan airson smachd ionmhasail soilleir no ùraichte gu leòr agus chan eil fosgarrachd agus cothromachd anns an ullachadh airson riaghladh air ar buidseat.
• Uaireannan bidh fiosrachadh bho shiostaman rianachd fadalach no neo-choileanta. Tha ar rianachd ionmhasail làitheil a’ gabhail a-steach fiosrachadh ionmhasail gun adhbhar don cheannard againn agus do dhaoine eile.
• Tha cuid de riarachadh bhuidseatan mu phrìomhachasan geàrr-ùine agus chan eil ach ceangal farsaing aca ri leasachadh air càileachd ionnsachaidh. Chan eil na suimean a bheir sinn seachad daonnan a’ leantainn
  prìomh-amasan leasachaidh na sgoile. Chan eil ar co-dhùnaidhean mun bhuidseat daonnan a’ toirt aire iomchaidh don fheum airson caomhnadh, comas, luach an airgid, no a’ toirt taic do phrìomh-amasan leasachaidh na sgoile againn agus a’ leasachadh builean airson luchd-ionnsachaidh.

CUSPAIREAN

• Togalaichean, foillseachadh agus dreach
• Solarachadh ghoireasan agus uidheam
• Eagrachadh agus cleachdadh stòrais
• Ullachadh airson slàinte agus sàbhailteachd a dhaingneachadh, a’ gabhail a-steach tèarainteachd

PRÌOMH CHOMHARRAN:

Tha an comharra seo co-cheangailte ri buaidh solarachadh agus rianachd stòrais agus an rùm a tha san sgoil air an àrainneachd ionnsachaidh. Tha e a’ cur cudrom air ìre brosnachaidh luchd-ionnsachaidh bho na togalaichean agus na goireasan, agus air ullachadh slàinte agus sàbhailteachd na sgoile.

ÌRE 5 EISIMPLEIR

• Tha na togalaichean againn, a’ gabhail a-steach trannsaichean agus raointean-cluiche, a’ toirt àrainneachd shàbhailte, thaitneach agus bheothail airson gnìomhan ionnsachadh, sòisealta agus cur-seachad. Tha àiteachan freagarrach againn airson clasaichean, luchd-teagaisg, stòradh, foillseachadh agus solarachadh sòisealta luchd-ionnsachaidh. Tha sinn a’ coinneachadh ri dleastanasan reachdail mu ruigsinneachd airson luchd-cleachdaidh ciorramach. Tha ar taisbeanaidhean de obair luchd-ionnsachaidh a’ toirt làn thaic do ionnsachadh agus teagasg agus a’ cruthachadh àrainneachd bheothail. Bidh sinn a’ dèanamh cothromachadh iomchaidh eadar obair luchd-ionnsachaidh, teacsa clò-bhuailte agus taisbeanaidhean malairteach.
• Tha goireasan freagarrach, a’ gabhail a-steach ICT, iomchaidh, ùr agus air an deagh chumail. Tha ar goireasan a’ toirt cothrom do luchd-teagaisg air teagasg math a dhèanamh agus do luchd-ionnsachaidh air ionnsachadh gu h-èifeachdach.
• Tha ar goireasan ann an deagh rian, so-ruigsinn, air an cleachdadh gu h-èifeachdach agus air an riaghladh ann an dòigh sheasmhach. Tha ionnsachadh agus teagasg san sgoil againn air a neartachadh tro chleachdadh planaichte de ICT, an àrainneachd ionadail, saoghal na h-obrach agus goireasan bho thaobh a-muigh na sgoile againn. Bidh sinn ag iarraidh air luchd-ionnsachaidh, a’ gabhail a-steach goireasan spèisealta, a bhith a’ cleachdadh ghoireasan air an ceann fhèin agus gu glic. Bidh sinn a’ sgrùdadh agus a’ measadh cleachdadh ghoireasan gus dèanamh cinnteach gu bheilear a’ coinneachadh ri feuman ar luchd-ionnsachaidh gu lèir.
• Tha na togalaichean againn tèarainte agus thathar air comharrachadh slàinte agus sàbhailteachd pàirtean de na togalaichean agus goireasan agus a’ dèiligeadh riutha. Bidh sinn a’ cur an gnìomh reachdas slàinte agus sàbhailteachd iomchaidh agus tha sinn furachail mu bhith a’ dèanamh cinnteach gu bheil ar luchd-ionnsachaidh tèarainte agus sàbhailte.

ÌRE 2 EISIMPLEIR

• Tha ar togalaichean sa chumantas a’ toirt àrainneachd shàbhailte ach feumar an atharrachadh airson taic a thoirt do ghnìomhan ionnsachaidh, teagaisg, sòisealta agus cur-seachad. Tha cion rùm no ìrean fuaime ann an cuid de raointean a’ cur bacadh air ionnsachadh agus teagasg. Tha an togalach againn feumach air sgeadachadh no càradh, agus tha e doirbh do chuid den luchd-cleachdaidh faighinn a-steach ann. ’S ann ainneamh a tha ar taisbeanaidhean de obair luchd-ionnsachaidh agus na nithean sa bheil ùidh aca air an atharrachadh agus gu tric chan eil iad a’ cur mòran ris an ionnsachadh agus an teagasg. Gu tric tha barrachd de stuthan na bùtha ann an taisbeanaidhean.
• Tha a’ chuid as motha de na goireasan againn ag obrachadh ach tha mòran dhiubh feumach air ùrachadh agus/no càradh. ’S e beagan uidheam agus ghoireasan ICT eile a tha againn a chuidicheas an luchd-ionnsachaidh againn. Tha seo a’ cuingealachadh grunn roinnean de obair na sgoile againn.
• Sa chumantas tha ar goireasan ann an òrdugh math. Tha am feum a tha sinn a’ dèanamh de ghoireasan a’ toirt taic do lìbhrigeadh ar clàr-teagaisg aig ìre bhunaiteach ach aig amannan chan eil e air a mhaidseadh gu math ris an rùn a tha san amharc agus chan eil e a’ toirt deagh thaic airson ionnsachadh agus teagasg no airson cur ri fiosrachaidhean eile. Bidh cuid den luchd-teagaisg a’ cur ris an ionnsachadh tro chleachdadh cruthachail air goireasan ach chan eil sinn a’ dèanamh mòran feum den àrainneachd agus na goireasan bho thaobh a-muigh na sgoile. ’S ann ainneamh a chleachdas ar luchd-ionnsachaidh goireasan air an ceann fhèin.
• Cha bhi sinn a’ dèanamh sgrùdadh mionaideach gu leòr air togalaichean na sgoile. Tha sinn air cùisean slàinte agus sàbhailteachd co-cheangailte a chomharrachadh ach cha robhar daonnan a’ dèiligeadh riutha gu h-èifeachdach.

CUSPAIREAN

• Tional, stòradh agus lorg dàta
• Co-roinn fiosrachaidh
• Mion-sgrùdadh, measadh agus cleachdadh fiosrachaidh

PRÌOMH CHOMHARRAN:

Tha an comharra seo co-cheangailte ri ullachadh na sgoile airson rianachd fiosrachaidh. Tha e a’ cur cudrom air siostaman na sgoile airson tional agus obrachadh fiosrachaidh agus air an ìre gu bheil e air a cho-roinn gus luchd-teagaisg a chuideachadh a’ leasachadh builean do luchd-ionnsachaidh. Tha e a’ sònrachadh na h-ìre gu bheil fiosrachadh air a chleachdadh airson sùil a chumail air adhartas luchd-ionnsachaidh.

ÌRE 5 EISIMPLEIR

• Bidh sinn a’ cleachdadh modhan èifeachdach airson tional agus stòradh dàta airson leasachadh an ionnsachaidh agus àrdachadh coileanaidh. Tha ar siostam fiosrachadh stiùiridh a’ toirt fiosrachadh feumail airson sùil a chumail air coileanadh ar luchd-ionnsachaidh, planadh a stiùireadh agus cuimseachadh air taic agus goireasan. Tha cothrom iomchaidh againn air dàta bho thaobh a-muigh na sgoile mu choileanadh coimeasach. Tha sinn a’ riaghladh fiosrachadh gus coinneachadh ri feuman ar luchd-cleachdaidh agus cothrom iomchaidh a thoirt air an fhiosrachadh. Tha ar n-ullachadh airson stòradh, faidhleadh agus lorg fiosrachaidh a’ cumail ri reachdas.
• Tha sinn a’ tuigsinn agus a’ leantainn protagailean airson fiosrachadh a cho-roinn. Bidh sinn a’ co-roinn fiosrachadh a’ gabhail a-steach dàta air buidseatan, luchd-obrach, coileanadh, frithealadh agus às-dhùnadh gu h-iomchaidh am measg luchd-teagaisg gus builean airson luchd-ionnsachaidh fa leth a leasachadh. Tha ar siostam fiosrachadh stiùiridh a’ toirt cothrom do chom-pàirtichean iomchaidh air an fhiosrachadh a dh’fheumar airson daingneachadh air deagh chor dhaoine òga agus leasachadh air an ionnsachadh. Tha fios aig ar luchd-ionnsachaidh agus an teaghlaichean mu fhiosrachadh sam bith a tha againn umpa agus cò dha a dh’fhaodadh sinn a shealltainn.
• Tha mòran dàta san sgoil againn. Tha sinn a’ cleachdadh mion-sgrùdadh dàta còmhla ri breithneachadh proifeiseanta gus cunntas a chumail air adhartas luchd-ionnsachaidh, piseach a bhrosnachadh, a sgrùdadh agus a nochdadh, coileanadh a threòrachadh agus gluasadan a chomharrachadh. Tha seo gar cuideachadh a’ comharrachadh coileanadh àrd agus ìosal ann an obair na sgoile againn gus cuimseachadh air taic agus aghaidh a chur air ionnsachadh. Tha sinn a’ cleachdadh dàta airson ar cuideachadh ag eadar-theachd gu luath far am bi feum air.

ÌRE 2 EISIMPLEIR

• Bidh sinn a’ tional agus a’ stòradh diofar dàta ach chan eil seo a’ gabhail a-steach cuid den phrìomh dàta a dh’fheumar airson leasachadh an ionnsachaidh agus àrdachadh coileanaidh. Tha ar siostam a’ toirt beagan taic don luchd-teagaisg againn airson planadh leasachaidh. Bidh sinn a' dèanamh beagan feum de dhàta air coileanadh coimeasach bho thaobh a-muigh na sgoile. Tha ar rianachd fiosrachaidh a’ coinneachadh ri feuman cuid de luchd-cleachdaidh ach chan eil e daonnan so-ruigsinn gu leòr. Tha ar n-ullachadh airson rianachd fiosrachaidh a’ cumail ri reachdas.
• Chan eil ar protagailean airson co-roinn fiosrachaidh aig ìre adhartach agus cha tàinig sinn gu aonta mun phrìomh sheata dàta a dh’fheumar airson taic a chur ri ar planadh airson leasachaidh. Fhuair dìreach cuid den luchd-teagaisg beagan trèanaidh air mìneachadh no cleachdadh rianachd dàta airson leasachadh a phlanadh. Cha bhi sinn a’
  co-roinn fiosrachadh gu leòr am measg luchd-teagaisg gus sealladh farsaing a thoirt de obair na sgoile againn agus cothrom a thoirt dhuinn leasachadh a dhèanamh air builean don luchd-ionnsachaidh againn.
• Bidh sinn a’ tional agus a’ mion-sgrùdadh diofar dàta ach chan eil sinn daonnan ga chleachdadh gu h-èifeachdach gus leasachadh a sgrùdadh agus a nochdadh, coileanadh a threòrachadh agus gluasadan a chomharrachadh. Tha siostaman againn airson cunntas a chumail air coileanadh luchd-ionnsachaidh ach chan eil buidhnean nas so-leònte, mar eisimpleir clann fo chùram, air an sònrachadh. Chan eil sinn daonnan a’ cleachdadh dàta airson eadar-theachd luath a dhèanamh nuair a bhios feum air.